काठमाडौं — प्रमुख प्रतिपक्षी दलका नेता पुष्पकमल दाहाल ‘प्रचण्ड’ले पाथीभरा केबलकार निर्माणका क्रममा स्थानीयमाथि गोली चलाएको घटनालाई लिएर सरकारको कडा आलोचना गरेका छन्।
बिहीबार प्रतिनिधिसभामा सम्बोधन गर्दै उनले सरकार निरंकुशतातर्फ उन्मुख भएको आरोप लगाए। उनले सामाजिक सञ्जाल नियमन विधेयक, सामाजिक अभियन्ता आशिका तामाङलाई हतकडी लगाई जिल्लाबाट जिल्ला घुमाइएको घटना, तथा पाथीभरा क्षेत्रमा स्थानीयमाथि दमन गरिएको विषय उठाए।
मुक्कुमलुङ पाथीभरा केबलकार निर्माणमा दमनको आरोप
प्रचण्डले मुक्कुमलुङ पाथीभरा केबलकार परियोजनालाई लिएर स्थानीयमाथि गोली चलाएको घटनाप्रति आपत्ति जनाए। “संवाद र समझदारीबाट समाधान खोज्नुपर्ने ठाउँमा सरकारले दमनको बाटो किन रोज्यो?” उनले प्रश्न गरे। पाथीभरा र मुक्कुम्लुङ क्षेत्रका विवाद संवेदनशील रहेको भन्दै उनले स्थानीयको आवाज नसुनेर दमन गरिएको बताए।
अभिव्यक्ति स्वतन्त्रतामाथि प्रहारको आरोप
उनले सामाजिक सञ्जाल नियमन विधेयकलाई प्रेस तथा अभिव्यक्ति स्वतन्त्रतामाथि नियन्त्रण लगाउने प्रयासको रूपमा व्याख्या गरे। “टिसर्टमा कसैको फोटो देखियो भनेर नागरिकलाई नियन्त्रणमा लिने, सार्वजनिक सेवा प्रवाहमा प्रश्न उठाउनेलाई मुद्दा लगाउने, विधेयक ल्याएर स्वतन्त्रतामाथि अंकुश लगाउने— यो सरकारको निरंकुश सोच होइन त?” उनले प्रश्न गरे।
राजनीतिक प्रतिशोधको आरोप
प्रचण्डले सरकार राजनीतिक प्रतिशोधमा लागेको आरोप लगाउँदै भने, “आज राज्य संयन्त्र दुरुपयोग गरेर नागरिकलाई डराउने काम भइरहेको छ। यो सत्ता सञ्चालनको अहंकार हो कि जनतासँगको डर?”
उनले लोकतान्त्रिक मूल्यमान्यतामाथि आक्रमण हुन नदिन सबै सचेत हुनुपर्ने भन्दै जनताको अधिकार सुरक्षाका लागि प्रतिपक्षी दलहरू एकजुट हुनुपर्ने बताए।
