काठमाडौं | लिम्बूहरूको मुन्धुमी कथामा आधारित नाटक ‘मुक्कुमलुङ’ चाेत्लुङ अफ याक्थुङ मण्डला नाटकघरमा मञ्चन भइरहेको छ। नाटकले मुन्धुमको सृष्टि कथा र सांस्कृतिक अतिक्रमणको मुद्दालाई प्रभावकारी रूपमा उठाएको छ।
सुसुवेन लालावेनको कथा र मुक्कुमलुङ क्षेत्रको सांस्कृतिक महत्त्वलाई केन्द्रमा राखेर तयार पारिएको यस नाटकले लिम्बूहरूको सांस्कृतिक विश्वास र पहिचानका विषयमा सशक्त सन्देश दिन्छ। यसले केवलकार निर्माणको विरोधमा कलात्मक तर्क प्रस्तुत गर्दै सांस्कृतिक धरोहरको संरक्षणको आवश्यकता औंल्याएको छ।
नाटकका मुख्य आकर्षणमा कलाकारहरूको उत्कृष्ट अभिनय, प्रकाशको कलात्मक संयोजन, र प्रत्यक्ष संगीत छन्। अनिल सुब्बाको निर्देशनमा तयार भएको यस नाटकमा विष्णु मोक्तान, वेदना राई, र सुरज तमुजस्ता कलाकारहरूको प्रभावकारी भूमिका छ।
नाटक माघ २७ गतेसम्म मण्डला नाटकघरमा मञ्चन हुनेछ।
