फिल्म समिक्षा
-स्वप्निल स्मृति
उपेन्द्र सुब्बाकाे ‘सिग्नेचर’ शैलीचलचित्र जारी- २ song of chyabrung (Director’s Cut) आजदेखि हलमा चलिरहेकाे छ । यसअघिकाे संस्करण हेर्दा तपाईँलाई कस्ताे लागेकाे थियाे कुन्नी ! आजदेखि हलमा आएकाे ‘डिरेक्टर कट’ वाला संस्करणले मलाई भने पूर्ण रुपमा तृप्त बनायाे । चरम सन्तुष्टि दियाे । फिल्म भनेकाे यस्ताे पाे त भन्ने महसुस गरायाे ।
च्याब्रुङकाे गीत
याे संस्करणमा अघिकाे भन्दा १४ मिनेट बढी कथालाई थपिएकाे छ । song of chyabrung (च्याब्रुङकाे गीत) भनिए जस्तै बल्ल अब यस फिल्मले परिपूर्णता पनि पाएकाे छ ।
‘जारी’ पहिलाे सिरिजले पाेहाेर साल अपार सफलता पाएकाे विदितै छ । ‘जारी २ song of chyabrung‘ पहिलाे भन्दा पनि विषयबस्तुका दृष्टिले बहुआयामिक छ ।
माओवादी र राज्य
याक्थुङ/लिम्बु समुदायलाई माओवादी र राज्यबिच चलेकाे दस वर्षे द्वन्द्वले पारिवारिक, सामाजिक, साँस्कृतिक, धार्मिक र राजनीतिक रुपमा कस्ताे असर गर्याे भन्ने विषयलाई बडाे मार्मिक र कलात्मक क्यानभासमा याे फिल्मलाई बुनिएकाे छ ।
खुसीकाे स्वर
याक्थुङ /लिम्बू जातिमा च्याब्रुङकाे विराट महत्व छ, च्याब्रुङ यानेेकी खुसीकाे स्वर, खुसी यानेकी जीवन हाे । च्याब्रुङ याक्थुङ लिम्बू जातिकाे जीवन हाे । जारी २ ले भन्न खाेजेकाे मूल दर्शन यही हाे । च्याब्रुङसँग एक व्यक्ति याक्थुङ (लिम्बू) सँगै सिङ्गाे समुदायकाे आत्मसम्मान र अस्तित्व अभिन्न रुपमा गाँसिएकाे हुन्छ । याे दार्शनिकीलाई “जारी २’ ले गहिराे रुपमा उजागर गरेकाे छ ।
पालाम अर्थात् धाननाच
अर्काे उल्लेखनिय पक्ष पालाम अर्थात् धाननाचमा गाइने भाका (गीत) काे महत्वलाई पनि फिल्ममा गम्भीरतापूर्वक उठान गरिएकाे छ ।
आफ्नै ताल, आफ्नै लय, आफ्नै सभ्यता, आफ्नै संवेदना, आफ्नै संस्कृति, आफ्नै दुखसुख, आफ्नै उकाली ओरालीमा बाँचिरहेकाे याक्थुङ/लिम्बू समुदायबिच जब सशस्त्र राजनीतिक द्वन्द्वकाे प्रवेश हुन्छ तब त्यस द्वन्द्वले त्याे समुदायकाे व्यापक जीवनमा के-कस्ताे असर पुर्यायाे ? त्याे समुदायकाे सामाजिक, पारिवारिक र व्यक्तिगत तहमा कस्ताे परिणाम दियाेे ? जारी २ हेरेपछि स्पष्ट जवाफ पाउन सकिन्छ ।
द्वन्द्वका कारण मेलाहाट बन्द भए, जहाँ च्याब्रुङ घन्किन्थ्याे, धाननाच नाचिन्थ्याे, पालाम गाइन्थ्याे, पक्लुङ (छेलाे) हानिन्थ्याे र जीवनकाे उत्सव मनाइन्थ्याे, प्रेम, सद्भाव, माया, पिरती, सहिष्णुता साटेर जीवन रङ्गीन र साँचाे रुपमा जीवन्त बन्थ्याे । द्वन्द्वले त्याे पक्षमाथि पुर्याएकाे आघातलाई सन्तुलित तराजुमा जारी २ मा देखाइएकाे छ ।
उपेन्द्र सुब्बाकाे ‘सिग्नेचर’ शैली
द्वन्द्वकै बिचमा फस्टाएकाे धर्मपरिवर्तनकाे खेललाई पनि बडाे राेचक तरिकाले प्रस्तुत गरिएकाे छ ।
पात्रका संवादमा निहित गहिराे मुन्धुमी भाव, हाँस्यरस, स्थानीय लवज, रैथाने साङ्गीतिकताले तपाईँलाई हुरुक्कै बनाउने छ । पात्र चरित्रका विविधतामा याक्थुङ/लिम्बू समाज सर्लक्कै आएकाे छ । संवेदना र भावनालाई व्यक्त गर्ने निर्देशक उपेन्द्र सुब्बाकाे ‘सिग्नेचर’ शैली बारे त तपाईँहरु पक्कै पनि आफैँ जानकार हुनुहुन्छ । अब कुन कलाकारकाे कुन चरित्र अभिनय कस्ताे त भन्नु पर्छ जस्ताे लागेन, सबै एकसेएक छन् । हतारकाे लेखाइ यति नै अहिलेलाई ।
तपाईं हेर्नू हाेला ‘जारी २ song of chyabrung’
