काठमाडौं। पाथीभरा केवलकार निर्माणको विषयले ताप्लेजुङदेखि प्रदेश नं. १ र संघीय राजधानी काठमाडौंसमेत तातेको छ। स्थानीयहरूले ‘नो केवलकार’ अभियान चलाएर आन्दोलनमा उत्रिएका छन्। एक पक्षले केवलकार निर्माण गर्नु पर्छ भन्ने माग गर्दै छ भने अर्को पक्षले यसको विरोध गर्दैछ। मुक्कुमलुङ संघर्ष समिति र केवलकार खारेजी संघर्ष समितिलगायतले मुक्कुमलुङ पाथीभरामा केवलकार निर्माणको विरोधमा आवाज उठाएका छन्।
केवलकार निर्माण रोक्न खोज्ने मुकुम्लुङ बचाउ अभियानका अभियन्ताहरु र प्रहरीबीच झडप हुँदा दर्जनौं घाइते भएका छन्। आन्दोलनमा प्रहरीले गोलि चलाउदा मुक्कुम्लुङ बचाउ अभियानका अभियन्ताहरु तिन जनालाई गोलि लागि सख्त घाइते भएको छ। गोलि लागि घाइते भएकाहरूको उपचार काठमाडौंमा भइरहेको छ। यो आन्दोलन तत्काल शान्त हुने अवस्था देखिँदैन। ताप्लेजुङका प्रमुख जिल्ला अधिकारी (सिडिओ) नेत्रप्रसाद शर्माले मुक्कुम्लुङ बचाउ अभियानका अभियन्ताहरुलाई गोली चलाउने आदेश दिएको आरोप लगाइएको छ। यसले गर्दा उनको विरोध पनि बढ्दै गएको छ।
ताप्लेजुङबाट प्रतिनिधिसभा निर्वाचित योगेश भट्टराईले केवलकार निर्माण गर्नु पर्छ भन्ने मत राखेका छन्। बुधबार काठमाडौंको बागबजार स्थित हार्दिक होटलमा आयोजित पत्रकार सम्मेलनमा उनले पाथीभरामा केवलकार बनाउनु पर्ने बारेमा आफ्नो अडान दोहोर्याई रहेका छन्। भट्टराईले केवलकारले ताप्लेजुङको विकासमा कायापलट हुने भास्य निर्माण गर्दै आइरहेको छ । तर, मुक्कुम्लुङ बचाउ अभियानका अभियन्ताहरुले केवलकार निर्माणले मुकुम्लुङको सांस्कृतिक विरासत नष्ट गर्ने आरोप लगाएका छन्। उनीहरूले काफ्लेपाटीबाट सशस्त्र प्रहरी क्याम्प हटाउन सरकारसमक्ष माग राखेका छन्।
पाथीभरा केवलकार ‘केवलकार किङ’का रूपमा परिचित चन्द्र ढकालको टिमले लगानी गरेको परियोजना हो। ढकाल आईएमई ग्रुपका अध्यक्ष हुन् र उनी नेपाल उद्योग वाणिज्य महासंघका अध्यक्ष पनि हुन्। उनले चन्द्रागिरी र मौलाकालीमा वन कब्जा गरेर केवलकार व्यापार गरेको आरोप छ। ढकालले बुटवलको लुम्बिनी केवलकार पनि निर्माण गरेका छन्। पाथीभरामा केवलकार निर्माणको जिम्मा उनको समूहले लिदा विवाद मौलिएको छ।
काफ्लेपाटीदेखि मुक्कुमलुङ पाथीभरादेवी मन्दिर नजिक करिब साढे २ किलोमिटर केवलकार बनाउन लागिपरेको ढकालको टिमले उक्त क्षेत्रमा राज्यको सशक्त उपस्थिति बढाएको छ। उक्त केवलकार निर्माणका लागि मुक्कुमलुङ पाथीभरा क्षेत्रमा सिंगो राज्य लागिपरेको पाइन्छ।
बागुलङ नगरपालिका वडा नम्बर १२ अमलाचौरका ढकालको वडासँग सीमा जोडिएको जैमिनीका नेत्रप्रसाद शर्मा ताप्लेजुङको सिडिओ बनेर गएका छन्। २०८१ साल कार्तिक १२ गते शर्माले सिडिओको कार्यभार सम्हालेका उनले त्यसको बाह्रौं दिनका दिन केवलकारको शिलान्यास गरेको थियो। संविधानसभा सदस्य डम्बरध्वज तुम्बाहाम्फे र फुङलिङ नगरपालिकाका नगरप्रमुख अमिर मादेनले केवलकारको शिलान्यास गरेका थिए। ताप्लेजुङका तत्कालीन सिडिओ रविन्द्र आचार्यले मुक्कुमलुङ पाथीभरामा केवलकार बनाउने प्रबन्ध मिलाउन नसकेपछि उनलाई गृह मन्त्रालय तानेर ढकालका गाउँले नेत्रप्रसाद शर्मालाई ताप्लेजुङको सिडिओ बनाएर पठाइयो। उनले सिडिओ बनेर गएको बाह्रौं दिनका दिन केवलकारको शिलान्यास गराउन सफल भएका थिए। केवलकारको शिलान्यास गर्दा झडप भएपछि सशस्त्र प्रहरी निरीक्षक (इन्स्पेक्टर)को कमाण्डमा ६० जनाको सुरक्षा बेस क्याम्प नै खडा गरेर फेरि केवलकार निर्माणको काम सुरू गरेको थियो। तर केवलकारको काम सुरू हुनसाथ नो केवलकार अभियान्ताहरु जुर्मुराए। सिडिओ शर्माको निर्देशनमा गोली चलेपछि गम्भीर घाइते भएका मुकुम्लुङ बचाउ अभियानका अभियान्ताहरूलाई हेलिकप्टरमा हालेर काठमाडौं ल्याइएको थियो। केवलकार निर्माण गर्ने सुरक्षाको टास्क लिएर ताप्लेजुङ पुगेका शर्मा पछाडि हट्ने मनस्थितिमा देखिँदैनन्।
३ अर्ब रुपैयाँ लागत लाग्ने दाबी गरिएको यो केवलकार हिमालयन कन्ट्रक्सनका इन्द्र केदेमले १५ महिनाभित्र निर्माण सक्ने बताएका छन्। चन्द्र ढकालले यस परियोजनामा सक्रिय भूमिका खेलिरहेका छ। उनी नेपाली राजनीतिमा पनि प्रभावशाली व्यक्ति मानिन्छन्।
मुक्कुमलुङ पाथीभरा क्षेत्रमा केवलकार निर्माण गर्ने उद्देश्यले पुगेका आङछिरिङ शेर्पा तत्कालीन पर्यटनमन्त्री रविन्द्र अधिकारीलगायतको हेलिकप्टर दुर्घटनामा निधन भएका थियो। अहिले चन्द्र ढकालले उक्त परियोजनाको जिम्मा लिएपछि स्थानीय जनताले ज्यान गुमाउनु पर्ने अवस्था आएको छ। केवलकार निर्माणले मुक्कुमलुङ पाथीभरा क्षेत्रलाई अशान्त बनाएको छ। यो विवादलाइ तत्काल समधान नगरे यसले भविष्यमा थप समस्या उत्पन्न गर्न सक्ने देखिन्छ।
