काठमाडौँ ।नेकपा एमालेका अध्यक्ष केपी शर्मा ओलीले ११ औँ राष्ट्रिय महाधिवेशनले पार्टीको सङ्गठनात्मक नीति र राजनीतिक प्रतिवेदन हेरफेर र परिवर्तन नहुने बताएका छन् । साथै ओलीले महाधिवेशनमा राजनीतिक प्रतिस्पर्धा गर्न खुला छाडिने समेत बताएका छन् । आइतबार पार्टी कार्यालयमा महाधिवेशनको लोगो सार्वजनिक गरेपछि सम्बोधन गर्दै अध्यक्ष ओलीले यस्तो बताएका हुन् ।‘महाधिवेशनमा मतदान हुन्छ । कसैले मतदान गर्न नदिएर, नभएर सर्वसम्मति गर्नुपर्छ भन्ने नाममा सेन्टिमेन्टलको कुरा हुँदैन, प्रतिस्पर्धा खुला हुन्छ । प्रतिस्पर्धा गर्न चाहनेले राम्रोसँग गर्न पाउँछ’, ओलीले भने– ‘तर अध्यक्षको हैसियतले मेरो आग्रह के हुन्छ भने जसले छाड्नुपर्छ र जसले बस्नुपर्छ सहमतिका साथ गरौँ।’
ओलीले एमालेमा डेमोक्रेसी छैन भन्ने गरिए पनि उनले एकताबद्ध भएर जानुपर्ने भन्दै एक अर्कामा आलोचना वा खुइल्याउने काम नगर्न आग्रह गरे ।उनले प्रतिस्पर्धालाई नराम्रो नमानिने भन्दै रोजेर र छानेर नै ल्याइएको दाबी गरे । ‘यसअघि नै हामीले नीतिगत रूपमा देशको व्याख्या विश्लेषण गरेका छौँ । ३ महिना अघि नै हामीले काम, सफलता र कमी कमजोरीको समीक्षा गरेर राजनीतिक प्रस्ताव पारित गरेका छौँ’, ओलीले भने– ‘सङ्गठनको अवस्था कस्तो छ त्यो पनि गरिसकेका छौँ । अहिले सङ्गठनात्मक नीतिमा कुनै परिवर्तन गर्नुपरेको छैन, भर्खरै विधान महाधिवेशनले गरेका छौँ । अब राजनीतिक प्रतिवेदनमा कुनै हेरफेर गरिरहनुपर्ने अवस्था छैन । किनभने भर्खरै महाधिवेशनले गरिसकेको छ।’
ओलीले विधानमा ठुलो परिवर्तन गर्नुपर्ने अवस्था पनि नरहेको बताए । ‘केही सानोतिनो रहेछ भने छोटो विधिबाट गरिनेछ । लामो डिस्कस हुनेछैन’, ओलीको भनाइ छ । उनले महाधिवेशनले नीति र सङ्गठनात्मक संरचना अघि बढाउने नेतृत्व प्रदान गर्ने भन्दै महाधिवेशन प्रतिनिधिले विवेक प्रयोग गरेर फैसला दिने विश्वास गरे।
‘यसमा कुनै असहमति राख्नुपर्ने ठाउँ पनि छैन, र आवश्यकता पनि छैन । एकताको महाधिवेशनका साथ अघि बढाइनेछ । महाधिवेशन पुनर्गठन र पुनर्संरचनाको थलो त हो तर तपाईं त्यही ठाउँमा बसेर खोलो छुन सक्नुहुन्छ तर पानी त्यही ठाउँबाट पटक पटक छुन सकिँदैन’, ओलीको भनाइ छ । ओलीले पार्टीभित्र उठ्दै आएको नेतृत्व हस्तान्तरण र पुस्तान्तरण हुनुपर्छ भनेर जोडदार रुपमा भनिरहनुनपर्ने भन्दै आवश्यकता अनुसार हुने बताए
