११ मङ्सिर काठमाडौँ । डा. सीके राउत नेतृत्वको जनमत पार्टीले फागुन २१ मा हुने प्रतिनिधिसभा चुनावमा संघीय लोकतान्त्रिक मोर्चामा आवद्ध दलहरुसँग गठबन्धन नगर्ने भएको छ । मंसिर ६ गते बसेको मोर्चाको बैठकले सबै घटक गठबन्धन गरेर चुनावमा जाने निर्णय गरेको थियो ।
जनमतका उपाध्यक्ष जयकान्त राउत समेत उपस्थित मोर्चाको उक्त बैठकमा मिलेर चुनावमा जाने सर्वसम्मत निर्णय भएको मोर्चाका संयोजक एवं लोसपा नेपालका अध्यक्ष महन्थ ठाकुरद्वारा जारी विज्ञप्तिमा उल्लेख थियो । तर जनमत पार्टी मोर्चाको उक्त निर्णयलाई उल्टाउँदै एक्लै निर्वाचन लड्न निर्णयमा पुगेको छ । यो कुराको पुष्टि जनमतका उपाध्यक्ष ई. बसन्त कुशवाहाले गरेका छन् । उनले मोर्चाको बैठकमा गठबन्धन गरेर चुनावमा जाने विषयमा कुनै सहमति नभएको दाबी समेत गरे । ‘कुनै नेताको विचार होला, तर मोर्चाको बैठकमा सर्वसम्मति भएको छैन, मोर्चाको तर्फबाट जुन निर्णय बाहिर आएको छ । त्यो लोसपाको तर्फबाट आएको हो,’ कुशवाहाले भने ।
एउटै चुनाव चिह्नमा सबै क्षेत्रमा तालमेल गरेर चुनाव लड्ने प्रस्ताव आएको उनले बताए । ‘तर जनमत पार्टीले त्यसो हो भने हर्न छापमा नै सबैजना लडौं भनेर धारणा राखेको थियो । अन्य पार्टीले आ-आफ्नै चुनाव चिह्नको प्रस्ताव बैठकमा राखेपछि सहमति बनेन,’ कुशवाहाले दाबी गरे । जसपा नेपालका अध्यक्ष उपेन्द्र यादवले पनि सबै क्षेत्रमा नभई कुनै कुनै क्षेत्रमा तालमेल गर्न सकिने धारणा राखेको उनले बताए । २०७९ को चुनावमा जनमत पार्टीले एक्लै चुनाव लड्ने निर्णय गरेको थियो । तराई-मधेसका अन्य दलहरुले गठबन्धन गरेर चुनाव लडेपनि जनमतले एक्लै चुनावमा प्रतिस्पर्धा गरेको थियो । पछिल्लो समय रुपन्देही क्षेत्र नम्बर ३ मा हुने भनिएको प्रतिनिधिसभाको उपनिर्वाचन (प्रतिनिधिसभा विघटन भएसँगै रद्द) मा पनि मोर्चाले एकसाथ चुनाव लड्ने निर्णय गर्दा जनमत पार्टीका अध्यक्ष राउतले अस्वीकार गरेका थिए ।
त्यसपछि जनमत संघीय लोकतान्त्रिक मोर्चाको बैठकमा सहभागी हुनै छाडेको थियो । तर मंसिर ६ गते बसेको बैठकमा जनमत पार्टीबाट सहभागिता भयो ।
प्रकाशित मिति: १२ मंसिर २०८२, बिहिबार
प्रतिक्रिया